Машката младинска кошаркарска репрезентација на Македонија со победа ја затвори групната фаза на Европското првенство од Дивизијата „Б“ во Братислава, Словачка.

Во последниот натпревар од групата „А“, избраниците на селекторот Никола Велев го совладаа Азербејџан со 67:57 и со вториот триумф на шампионатот го освоија третото место во групата, кое им носи продолжение на натпреварувањето во разигрувањето за пласман од деветтото до 16 место.

Марко Луканоски беше најистакнат во македонскиот состав со „дабл-дабл“ учинок од 15 поени и 14 скока.

Коста Ќириловски натпреварот го заврши со 16 поени и шест скока, додека Сергеј Младеновски придонесе со 10 поени, пет скока и пет асистенции.

На Европското првенство следува слободен ден, а од 17 јули започнува елиминациската фаза. Како третопласирана селекција од групата „А“, Македонија ќе ги продолжи настапите во разигрувањето за пласман од деветтото до 16 место, каде ќе се сретне со Грузија, противник од групата „Б“.