Американскиот претседател Доналд Трамп во октомври поминал магнетна резонанца во Медицинскиот центар „Волтер Рид“, но ниту тој ниту Белата куќа не открија кој дел од телото бил прегледан.

Портпаролката Керолин Ливит денеска повторно избегна да наведе конкретности, иако потврди дека скенирањето било дел од вториот медицински преглед на Трамп оваа година.

Во соопштението од Белата куќа е наведено дека резултатите биле разгледани од радиолози и консултанти, кои едногласно процениле дека Трамп е „во одлична физичка состојба“.

Притоа, Ливит нагласи дека скенирањето било рутински дел од контролата, иако магнетната резонанца не е вообичаен сегмент од стандардните физички прегледи.

Трамп претходно само потврди дека резонанцата ја направил на 10 октомври, без да наведе дополнителни детали за причините или наодите.

Белата куќа останува на ставот дека нема ништо необично и дека здравствената состојба на претседателот е стабилна.