Повеќе познати личности потпишаа отворено писмо во кое ги повикуваат американските власти да го затворат Центарот за имигранти „Дили“ во Тексас, каде што агенциите за имиграција притвораат цели семејства, пренесува „Холивуд репортер“.

Мадона, Марк Рафало, Педро Паскал, Хавиер Бардем, Америка Ферера, Елиот Пејџ и Џејн Фонда се меѓу потписниците на писмото кое започнува со изјавата:

„Ниту едно дете не треба да биде заклучено во имиграциски притворски центар.“

Како што пренесуваат американските медиуми, меѓу дополнителните потписници на отвореното писмо се и Џон Леџенд, Бренди Карлајл, Хана Ајнбиндер, Алехандро Гонзалес Ињариту, Вунми Мосаку, Били Портер, Кики Палмер, Хасан Минхаџ, Кејти Курик, Сузан Сарандон и десетици други.

Според извештај на „Ен-би-си Њуз“, децата притворени во Дили се жалеле на ограничено образование, постојано осветлени простории и мувлосана храна.

За време на администрацијата на американскиот претседател Доналд Трамп, повеќе од две илјади и триста деца биле притворени заедно со нивните родители, при што повеќето биле сместени во Дили, според податоци од судски набљудувачи. Многумина биле задржани неколку недели или месеци.

„Децата во имиграциски притвор трпат трауми, занемарување и услови што ги прекршуваат основните стандарди за здравје, безбедност, достоинство и човекови права. Судските пријави за злоупотреба на деца вклучуваат одбивање да се обезбеди чиста вода, расипана храна контаминирана со црви, опасно медицинско занемарување, недостаток на сон, ускратување правна помош, раздвојување на децата од семејствата и одмазда кон семејства кои протестираат против нехуманите услови. Децата припаѓаат во училишта и на игралишта, а не во притворски центри“, се наведува во дел од писмото.

Писмото понатаму ја повикува федералната влада и компанијата „КорСивик“ на итно затворање на центарот „Дили“, враќање на децата и семејствата во нивните домови и заедници, како и прекин на практиката на притворање деца.

„Нашата посветеност не завршува со затворањето. Бараме транспарентност, одговорност и системски реформи за да се спречи вакво злоупотребување да се случува каде било во Соединетите Американски Држави“, стои во писмото.

Рејчел Акурсо, која првпат дознала за „Дили“ откако федерални агенти го притвориле таткото на петгодишниот Лијам Конеја Рамос во Минеаполис и ги испратиле двајцата во „Дили“, неодамна имала видеоповик со деветгодишниот Деивер Хенао Хименез, притворен заедно со родителите на почетокот на март. Тоа бил нејзиниот втор видеоповик со притворено дете, по првиот со петгодишно дете по име Гаел.

„Беше неверојатно надреално да се види тоа слатко мало лице и да се чувствува како да сум на повик со некој што е во затвор. Тоа ме скрши и е нешто што никогаш не мислев дека ќе го доживеам во животот. Се обидуваме да извадиме дете од затвор за да учествува на натпревар. Никогаш не мислев дека тие зборови ќе одат заедно“, изјавила Акурсо во разговор за „Ен-би-си Њуз“.