Мачорот Јилпи од Хелсинки, кој има 31 и пол година, е официјално кандидат за титулата најстара жива мачка на светот. Сопственичката Тина Корхонен поднела пријава до Гинисовата книга на рекорди, наведувајќи дека Јилпи е роден на почетокот на 1990-тите години и дека поголемиот дел од животот го поминал како село мачор, поголемиот дел од времето на отворено. Процесот на верификација е комплициран поради сериозна сообраќајна несреќа во која мачорот учествувал, поради што мора дополнително да се потврди неговата возраст и идентитет. Одлуката на Гинис ќе се соопшти во март, пренесува „Еуро њуз“.

 

View this post on Instagram

 

A post shared by Iltalehti | Suomen suurin uutispalvelu (@iltalehti)

Светскиот рекорд за најстара жива мачка моментално го држи британската мачка Флоси, која неодамна го прослави својот 30. роденден, пренесува „Кликс.ба“. Флоси е родена на 29 декември 1995 година и ја освои првата светска титула во 2022 година, кога имаше 26 години и 316 дена. Власничката Вики Грин ја вдомила Флоси преку британската хуманитарна организација „Cats Protection“, откако претходните сопственици починале.

Вики ја опишува Флоси како посебен и верен миленик: „Од почетокот знаев дека Флоси е необична мачка, но не можев да замислам дека ќе споделувам дом со светска рекордерка. Секогаш сакав постари мачки да им обезбедам удобен и мирен живот“.

И покрај годините и одредени здравствени проблеми, Флоси останува игрива и приврзана, со дневна рутина што вклучува игра, редовни оброци и доволно сон.

Иако Јилпи има повеќе години од Флоси, неговото официјално признавање сè уште е во процес. Доколку Гинис ја потврди неговата возраст, Јилпи ќе ја преземе титулата најстара жива мачка во светот, обединувајќи го рекордот со неговата долгогодишна историја како здрав и отпорен мачор кој го преживеал животот на отворено и со многу предизвици.

За споредба, најстара мачка што некогаш живеела е Crème Puff, која живеела повеќе од 38 години.