Љубљана добива музеј на балкански хумор, институција во која ќе бидат изложени околу четиристотини шеги, објави агенцијата „СТА“.

Со официјалното отворање, „Глупости – Музејот на балкански хумор“ ќе стане место каде тематски ќе бидат изложени шеги на различни теми во неколку простории, од храна и пијалаци до меѓучовечки односи, со еден агол посветен и на децата.

Шегите се презентирани на начин што е разбирлив за жителите на Балканот, но и за посетителите кои зборуваат англиски, германски и италијански јазик, пишува словенечката агенција.

Проектот со денови беше најавуван од мистериозни постери, за кој се шпекулираше во последните недели не само во Љубљана и Словенија, туку и во Загреб и Белград.

Ова е првиот музеј на балкански хумор во светот. Создаден е врз основа на „графити“ што иницијаторот Борут Кокељ почнал спонтано да ги собира во младоста, а денес ги има повеќе од 25 илјади.

Музејот, кој ќе биде отворен секој ден од неделата, е дизајниран така што неговата колекција може постојано да се менува и ажурира.

– Четиристотини вицови, пет јазици, пет соби, чаша ракија на влезот или излезот и нула сериозни теми – рекол Кокељ.