Во мафијашка пресметка во белградската населба Бежаниска коса, денес во 18.30 часот е убиен 41-годишен маж, кој со повреди опасни по живот е пренесен во болница, каде им подлегнал на повредите, пренесува српски „Курир“.

Жртвата е извесен Марко В. од црногорскиот град Котор, кој неодамна пристигнал во Србија од странство.

Според српскиот медиум, , 41-годишниот маж е убиен во класична заседа, и тоа додека во автомобилот бил со својата жена и дете.

Како што дознава „Курир“, мажот во својот автомобил со жената и детето, го чекал своето друго дете пред училиштетот кое се наоѓало во близина. Во тој момент, убиецот му пристапил одзади, стигнал до возачката врата и му пукал во главата.

Застреланиот со години работел како морнар на прекуокеански бродови. Според сознанијата на српски „Курир“, кои се повикуваат на оперативни информации на полицијата, убиениот бил вклучен во шверц на наркотици од Јужна Америка кон Европа.

Увидот на полицијата е во тек, а во следниот период се очекуваат дополнителни информации за настанот.