Салата од лубеница и краставици е совршен оброк за летно освежување, кое може да го направите уште поинтересно со додавање кромид, фета сирење и свежи билки како нане или босилек, пишува „Пун куфер“.

Во оваа комбинација може да вметнете и домати, авокадо, маслинки или лути пиперчиња. Наместо фета, можете да ставите и топчиња моцарела.

Пред да почнете да ја правите салатата, добро изладете ги лубеницата и краставица и исечете ги на коцкички. Иако салатата може да се јаде како самостоен оброк, таа е одлична и со месо или зеленчук на скара.

Состојки:

• 1/2 главица кромид
• 2 големи лимети
• 700 гр лубеница
• 250 гр краставици
• 1 куп листови нане
• 50 гр фета сирење
• 2,3 лажици маслиново масло
• сол, бибер

Подготовка:

Исечкајте го кромидот на тенки кришки, прелијте го со цеден сок од лимета и оставете го кромидот десетина минути за да омекне.

Краставицата и лубеницата исечкајте ги на коцки и измешајте ги со листовите нане и фета сирењето.

Извадете го кромидот од сокот и додадете го во садот со лубеницата и другите состојки.

Измешајте го маслиновото масло со преостанатиот сок од лимета и додајте сол и бибер. Прелијте ја салатата и нежно измешајте.