Надворешната канцеларија за криминалистички работи Струга поднесе кривична пријава против И.К.(33) од струшкото село Вевчани, поради постоење основи на сомнение за сторени кривични дела „фалсификување на исправа“, „измама“ и „надрилекарство“.

Се работи за вевчанецот кој со години работел како лекар во здравствениот дом во селото и дури бил поставен за началник, иако не завршил медицински факултет, односно немал лекарска диплома.

Како што информираат од МВР, пријавениот изготвил три лажни исправи: уверение за положени испити при Факултет за медицински науки при Универзитет „Гоце Делчев”- Штип, лиценца издадена од Лекарска Комора на РСМ и уверение од Лекарската комора и ги употребил за вработување на работно место лекар во ЈЗУ Здравствен дом Вевчани.

-Делото го сторил во два наврати и кога за првпат аплицирал за работа на јавен оглас од 05.09.2016 година, но не бил селектиран како кандидат за вработување и со аплицирањето од 04.10.2018 година, кога бил селектиран и вработен со Договор за вработување од 26.11.2018 година со одлука на Директорот на ЈЗУ Здравствен дом Вевчани. Пријавениот, по основ на договорот за вработување во периодот од 26.11.2018 до 19.10.2022 и претходно од 03.10.2016 до 26.11.2018, со склучени договори за дело, обавувал работни задачи на работно место – доктор на медицина, со што го нарушил угледот на болницата и ги оштетил буџетот на болницата и буџетот на РСМ, а за себе прибавил материјална корист во износ од околу 3.507.208 денари, се вели во соопштението од МВР.

Лекар со лажна диплома шест години ги лечел вевчанци?