Млад австралиски пожарникар-доброволец денес е обвинет дека подметнал седум пожари пред да им се придружи на колегите во борбата против огнената стихија, пренесуваат австралиските медиуми.

Властите го обвинија ова 19-годишно момче дека предизвикал седум пожари на југот во сојузната држава Нов Јужен Велс.

Оваа сојузна држава имаше најсериозни проблеми поради шумските пожари кои беснееја по австралискиот брег од средината на октомври до средината на овој месец.

Неименуваниот доброволец вчера е забележан во автомобил, недалеку од местото кадешто потоа е пријавен пожар.

– Полицијата пред судот ќе тврди дека тој човек го запалил огнот и потоа го напуштил подрачјето, за потоа да се врати како пожарникар-доброволец – наведе полицијата преку соопштение.

Момчето набрзо потоа е уапсено и обвинето за подметнување на пожари и небрежност и отпуштено од пожарникарската служба.