Косовската компанија „Viva fresh store“ („Вива Фреш стор“) го купува штипскиот ланец маркети „Кит-го“, објави Фактор.

Според информации на порталот, кој ги потврдува и првиот човек на „Вива фреш стор“ во Македонија Беким Бекири, договорот е веќе направен. Косовската фирма за сите маркети на „Кит-го ќе искешира над 50 милиони евра, пишува Фактор. Иако трансакцијата е повеќе од извесна, комплетното преземање ќе се реализира од јануари следната година.

„Viva Fresh Store“ е водечки ланец на маркети во Косово. Има 64 објекти во 21 град и работи со повеќе од 60.000 различни производи. Според податоците од Косово, „Вива фреш сторе“ има над 3.000 вработени и генерира годишни приходи од над 200 милиони долари. Во август 2019 година, „Вива фреш“ ја почна својата експанзија во Македонија, со отворање на маркет во Скопје, а истата година купи и локална фабрика за месо, од каде ги снабдува со свежо месо сите 64 продавници во Косово.

„Кит-го“, пак, е штипска компанија, која постоиои 23 години. Низ тие години се изгради во препознатлив бренд во малопродажбата. На продажба, според нашите неофицијални информации се неколку десетици деловни единици на брендот, а Тера маркет и Супер Кит -го остануваат кај штипскиот сопственик. Компанијата работи во 11 градови во државата.