Заради ширењето на коронавирусот, смален е маневарскиот простор на шверцерите на дрога, а поради тоа што има премногу бариери до најсилните светски пазари влијаело на тоа, барем на балканските рути, да се забележи драстичен пад на бројот на кривични дела поврзани со продажба или шверц на опојни дроги.

Според пишувањата на „Побједе“, Црна Гора ги затворила границите и ги зајакнала контролите, така што шверцерите кои би пробале да криумчарат дрога, не би можеле да пројдат неприметено, а наркодилерите не се во можност да шверцаат дрога која во Европа доаѓа од Блискиот исток.

Како што утврдиле безбедносните служби вообичаените канали на дистрибуција на хероин главно одат преку Турција, а за кокаин преку Јужна Америка.

Кога станува збор за улична продажба на дрога, таа е сведена на минимум, заради забраните за движење, но од Управата на полиција уште немаат официјални податоци за март.

Во првите два месеци на 2020 година во Црна Гора се запленети 42,6 килограми дрога, како и 3.283 различни таблети.