Имаме обезбедено двотретинско мнозинство за одржување на вонреден конгрес на партијата, истакна попладнево членот на ВМРО-ДПМНЕ, Ивица Коневски во емисијата „10 минути“ на ТВ 21.

Поранешниот градоначалник на Аеродром тврди дека конгресот што го закажа Иницијативниот одбор е легитимен и дека поддршка на Иницијативата дале околу 500 делегати од последниот Конгрес на ВМРО-ДПМНЕ, а меѓу поканетите ќе бил и Мицкоски.

– Целта е да побараме одговорност од актуелното раководство, пред сè, од претседателот за неколкуте изборни порази. Ќе биде поканет и Мицкоски, па доколку ги убеди делегатите дека поразите не се по негова вина, се надеваме дека партијата ќе излезе посилна и пообединета, нагласи Коневски.

Одлуката за вонреден конгрес на ВМРО-ДПМНЕ ја донесе Иницијативен одбор и собирот на делегатите го закажа за 28 март во Скопје. Од таму сметаат дека Мицкоски повеќе „нема капацитет да ја води партијата и дека не уживал доверба меѓу членството“.

Неколку часа подоцна, заседаваше Централниот комитет на ВМРО-ДПМНЕ чии членови ја отфрлија Иницијативата за вонреден конгрес и донесоа одлука за одржување на редовен конгрес во ноември.