Праизведбата на драмскиот текст „Анна“ од Драгана Лукан Николоски се одржа на 3 декември на малата сцена на Театар Комедија со истоимената претстава во режија на Нина Николиќ. Станува збор за праизведба на текст којшто е дел од проектот „Трилогија за љубовта“ на авторката Драгана Лукан Николоски во кој се содржани уште и драмите „Марта Верина“ и „104“.

Драмата е инспирирана од „Ана Каренина“, но не претставува нејзина драмска адаптација, туку на интригантен и модерен начин Лукан Николоски ги открива животот, желбите и страстите на современата жена. Ана има сè – углед, стабилност, совршено семејство. Но зад затворените врати се крие една друга вистина: таа е невидлива во својот живот.

Кога се среќава со Алексеј, страста ѝ дава илузија за слобода. Тоа е свет во кој доминираат мажите, но одлуката на крајот, сепак, ја носат жените. Современата Анна избира да има избор и да ја плати цената на својата одлука. Се спротивставува на бракот во кафез, но бунтот ја носи во ново ропство.

Режисерката Нина Николиќ претходно го постави и текстот „Марта Верина“ од Драгана Лукан Николоски. Таа одлично го познава ракописот на Лукан и внимателно ги прочитала нијансите на текстот „Анна“, суштината и пораката. Праизведбата на „Анна“ се случи во камерната сала на Театар Комедија. Во камерни услови, со минималистичка сценографија, неопходна костимографија и со поставување на дел од актерите меѓу публиката, Николиќ успева да создаде амбиент на блискост и соочување. Публиката добива чувство како да е дел од самото драмско дејство.

Главниот лик Анна на почетокот е прагматична и рационална сопруга, но кога ќе се појави предизвикот на страста, таа ја открива својата чувствителност и емотивност. Иако асоцијациите водат кон историската Ана Каренина, на сцената гледаме современа и еманципирана Анна, која не сака да остане само сопруга на висок државен службеник, туку сака да ги врати страста и љубовта во својот живот.

Главната улога во претставата ја игра Маја Љутков, која со спектар на емоции и нијанси на чувства умешно го доловува ликот на современата Анна. Во расчекор помеѓу рационалноста и страста нејзиниот лик ја доживува судбината на Ана Каренина. Нејзини партнери на сцената се актерите Благој Веселинов и Саша Ханџиќ, а ликовите што ги играат не случајно имаат исто име – Алексеј. Во премиерната изведба на претставата играше и актерката Маја Зеќо, чија епизодна улога поттикнува некои од постапките на главната „хероина“.

Минималистичката сценографија во претставата е на Илина Ангеловска, костимите ги креираше Ивана Каранфиловска Угуровска, а музиката ја компонираше Оливер Јосифовски.

Проектот е поддржан од Министерството за култура и туризам на РСМ и од Гете институтот, а се реализира како копродукција помеѓу „Перипетија продукција“ и Театар Комедија.

(Текстот е објавен во „Културен печат“ број 310, во печатеното издание на весникот „Слободен печат“ на 6-8.12.2025)