Погребот на актерот Лазе Манасков, кој почина на 20 декември на 67-годишна возраст, ќе се одржи денеска на Градските гробишта во Бутел. Како што информираат од Драмскиот театар – Скопје, каде што Манасков ја мина најголемата дел од својата професионална кариера, телото ќе биде изложено во капелата од 11:30 до 12:30 часот.

Комеморативен настан во негова чест ќе се одржи на 24 декември, со почеток во 12 часот, во просториите на Драмскиот театар.

Манасков е роден на 27 март 1958 година во Скопје, а дипломирал на Факултетот за драмски уметности во главниот град. Од 1983 година беше дел од ансамблот на Драмски театар – Скопје, каде што остана активен сѐ до своето пензионирање во 2022 година.

Покрај впечатливите театарски улоги, Манасков зад себе остави и значаен печат во филмската и телевизиската продукција. Публиката ќе го памети по настапите во повеќе македонски филмови и серии, меѓу кои „Големата вода“, „Сенки“, „Исцелител“, „Врба“, „Хомо“, „Кајмак“, како и телевизиските проекти „Трст виа Скопје“, „Тврдокорни“, „Преспав“, „Фамилијата Марковски“, „Бистра вода“ и други.