Белоруската опозиционерка Марија Колесникова тврди дека безбедносните службеници и ставиле ќеса врз главата и се заканиле дека ќе ја убијат при насилниот обид за нејзина депортација во Украина, се наведува во изјавата што денеска ја поднел нејзиниот адвокат. Британските медиуми пренесуваат дека Колесникова изјавила дека е искрено исплашена за нејзиниот живот.

– Особено ми беше нагласено дека доколку доброволно не ја напуштам Белорусија, тие сигурно ќе ме протераат, жива или во делови. Имаше закани дека ќе ме стават во затвор до 25 години”, напишала Колесникова во изјавата.

Белоруските медиуми се повикуваат на очевидци: Киднапирана опозиционерката Марија Колесникова

Нејзиниот адвокат изјави дека Колесникова поднесува кривични пријави против белоруските власти, вклучувајќи ја и безбедносната полиција КГБ.

Колесникова, истакнат лидер на протестите против реизборот на претседателот Александар Лукашенко, го спречи обидот да биде протерана од земјата, со тоа што го искинала својот пасош. Таа во моментот се наоѓа во притвор во Минск.

Колесникова била приведена под сомнение дека сторила предавство, како дел од кривичната постапка за обид за преземање на власта, ја цитираа руските меидуми изјавата на нејзиниот адвокат.

Во понеделникот беше објавена неофицијална информација дека оваа истакната опозиционерка „исчезна”, односно дека маскирани лица ја турнале во минибус. Информацијата беше објавена ден по масовните протести против Лукашенка во Минск за време на викендот.