Колажни апстракции на Валентина Поцеска се изложени во галерија „Метаноја“
Во галеријата „Метаноја“ во Скопје, во соработка со „Балкански институт за вера и култура“, на 14 март, во 19 часот, ќе биде отворена изложбата „Quo Vadis“ на академскиот сликар Валентина Поцеска. Изложбата ќе трае во текот на март 2024.
За изложбата д-р Коста Милков напиша: „Во изложените дела на Поцеска доминираат три геометриски форми, триаголникот, кругот и квадратот. Според нејзиниот уметнички и духовен сензибилитет овие форми се ’врската‘ меѓу физичкото и духовното. Од една страна, тие претставуваат физички фигури врз кои се темелат основните архитектонски закони, а од друга страна, секој од нив е симбол за определена духовна димензија. Од христијанска толковна точка кругот е симбол на вечноста, триаголникот на Светата Троица, а квадратот на правдата и на вистината. Оваа интуитивна ’теолошка‘ беседа на Поцеска станува повпечатлива со не толку честото, но значително, вклучување и на фигурата на крстот – најважниот христијански симбол. Колажните апстракции на Поцеска се втемелени во катафатичките физички феномени и конципирани преку апофатичките метафизички идеи.“
На отворањето на изложбата ќе се обрати рецензентот д-р Коста Милков и директорката на Галерија „Метаноја“ м-р Нада Милкова.
Валентина Поцеска е родена 1965 во Скопје. Во 1987 дипломирала на ФЛУ во класата на проф. Димитар Кондовски. Од 1992 година работи во Национален конзерваторски центар – Скопје, во одделот за конзервација на икони.