Кошаркарите на МЗТ Скопје славеа во првата пресметка против Работнички во натпреварување кое има меѓународен карактер. Во неизвесен натпревар исполнет со пресврти, „металците“ победија со 84:82 во рамки на осмото коло од АБА2 лигата.

Тренерот на МЗТ Скопје, Ѓорѓи Кочов смета дека неговиот тим заслужено победи иако во финишот имаше негатива од четири поени која беше анулирана со серијата на неговите кошаркари од 8:0 во последните две минути.

– Ова беше интересно македонско дерби во АБА. Задоволен сум од поголемиот дел од мечот, но како да ни влезе „вода во уши“ кога противникот ни постави зона, а кога не погодивме неколку шутеви, по што следеше пресврт. Факт е дека имавме контрола повеќе од 30 минути и дека заслужено победивме. Им честитам на моите кошаркари за карактерот, не е лесно да водиш 13 разлика, па да губиш, па во финишот да се вратиш и да победиш – изјави Кочов.

Од друга страна, тренерот на Работнички, Димитар Мираковски, жали за пропуштената шанса да се победи вечниот ривал.
– Одигравме прилично лошо во голем дел од мечот. Се баравме себеси, не можевме да влеземе во посакуваниот ритам, дававме се од себе. Бевме упорни и со една комбинирана зонска одбрана успеавме да се вратиме и да поведеме. Сепак, на крајот, најискусните играчи направија две катастрофални грешки, промашен зицер на „плус четири“, а потоа и чекори, што се покажа пресудно за да го загубиме овој натпревар. И покрај петте фаули на Бундовиќ се вративме, но немавме сили за триумф – вели Мираковски.