Како дел од јубилејната програма „50 години МКЦ“ на 28 декември во кино „Фросина“ се одржа промоцијата на книгата „Неправилен ритам – Приказни од современата македонска музичка сцена“ од новинарот Љупчо Јолевски.

Станува збор за негова втора книга, по „Радио“, со објавени прилози, интервјуа и рецензии, овој пат содржински исполнета само со текстови од областа на музичката уметност. Замислена неконвенционално, со повеќе музика отколку говор, на промоцијата настапија неколку музички групи и состави, а промотори на книгата беа Тина Иванова, Ана Стојаноска и Дејан Трајкоски.

„Навистина се ретки луѓето, барем од она што можеме да го видиме околу нас и овде, кои толку посветено ѝ приоѓаат на својата работа, како што тоа е случај со мојот почитуван колега Љупчо Јолевски“, заклучила Тина Иванова, која е новинар и музиколог по вокација, додека театрологот, професор и писателка Ана Стојаноска потенцира дека „оваа книга, иако делува како место за чување на историјата, е одлична база за чување на сето она што во денешен контекст значи современа музичка култура и како таква треба да ни биде дел од нашето секојдневно културно и уметничко доживување“.

Поранешниот новинар Дејан Трајкоски, пак, книгите на Љупчо Јолевски ги гледа како „текстуални винили. Документаристички раритет. Искра светлина од мрачните лавиринти на македонското копи-пејст новинарство. Навезени вистини за едни времиња, гледани од горе, од високо, а срочени лесно, чиниш, како со пердув“, посочува Трајкоски.

Книгата „Неправилен ритам“ содржи повеќе од дваесет години музичка историја на повеќе од 500 страници во издание на „Софија“ – Богданци. На промоцијата своите приказни музички поврзани со книгата на Љупчо Јолевски ги раскажаа Александра Поповска, Крсте Роџевски, „Суперхикс“, Дробицки/ Омерагиќ/ Кондовски трио, Дориан Јовановиќ – Јордан Костов дуо, Сашо Поповски/ Иван Бејков/ Ратко Даутовски трио и Дејан Спасовиќ со „Здух“.

(Текстот е објавен во „Културен печат“ број 161, во печатеното издание на весникот „Слободен печат“ на 31 декември 2022 – 2 јануари 2023)