Либеријците гласаат на жестоко оспоруваните претседателски избори, при што поранешната фудбалска ѕвезда Џорџ Веа (57) се кандидира за втор мандат. Неговиот главен предизвикувач е поранешниот заменик претседател Џозеф Боакаи (78), пренесува Би-Би-Си.

Боакаи ја води својата кампања под слоганот „Спасување“, тврдејќи дека западноафриканската држава тргна надолу за време на првите шест години на власт на Веа. Но, Веа е убеден во победата, велејќи дека ја задржал Либерија стабилна и го подобрил образованието.

Ова ќе биде првпат генерација млади гласачи, родени во мирновременска Либерија, да гласаат за претседател. Бруталната граѓанска војна, во која загинале околу 250.000 луѓе, завршила пред две децении.

Многу Либеријци бараат формирање на суд за воени злосторства за да се изведат пред лицето на правдата клучните личности зад конфликтот, велејќи дека неуспехот да се стори тоа создал култура на неказнивост.

Веа досега се спротивстави на притисокот, велејќи дека фокусирањето на старите злосторства не е најдобриот начин да се постигне развој. Боакаи – заедно со двајца други водечки кандидати, бизнисменот Александар Камингс и адвокатот за човекови права Тиаван Гонгло – ветија дека ќе формираат суд.

Околу 2,4 милиони луѓе се пријавени за гласањето. Вкупно 19 кандидати – вклучително и две жени – се натпреваруваат против Веа, кој ја презеде функцијата од првата избрана жена претседател на Африка, Елен Џонсон Серлиф, откако таа се повлече на крајот на двата мандати во 2018 година.

Гласачите ќе гласаат и за парламентарните претставници на изборите во вторник. Главните партии во Либерија ветија дека ќе го зачуваат мирот за време на изборите, и покрај судирите меѓу ривалските табори во последните денови од кампањата.

Насилствата поврзани со изборите оставија тројца мртви во септември. Веа, кој бил избран за најдобар светски фудбалер на ФИФА во 1995 година, влезе во политиката по неговото повлекување од фудбалот.

Тој го освоил својот прв мандат во 2017 година, откако обезбедил 61 отсто од гласовите во вториот круг, победувајќи го Боакаи, кој бил заменик на Сирлиф. Аналитичарите велат дека ова можеби е последен обид на 78-годишникот за претседател.