На Нова Година, Кипар, една од најмалите членки на Унијата, го презеде ротирачкото шестмесечно претседателство со Советот на ЕУ од Данска.

Поделената островска држава во источниот Медитеран со население од нешто помалку од еден милион, која е членка на ЕУ од 2004 година, ќе го одржи претседателството со Советот на ЕУ по втор пат во првите шест месеци од оваа година, а Ирска ќе го преземе во втората половина од годината.

Кипарскиот претседател Никос Христодулидес објави дека приоритетите на претседателството ќе бидат зајакнување на стратешката автономија на ЕУ, почнувајќи од одбраната и безбедноста до енергијата, конкурентноста, миграцијата, достапното домување, како и приближувањето на Унијата кон Блискиот Исток и Источниот Медитеран.

Приоритетите вклучуваат и континуирана поддршка за Украина, договор за седумгодишниот буџет на ЕУ за периодот 2028-2034 година и проширување.

-Автономната Унија е онаа што е силна одвнатре, способна, пред сè, да ги заштити своите граѓани, своите граници и своите интереси. Унија што е способна да создава партнерства и сојузи од позиција на сила, целосно свесна дека колку е посилна, толку повеќе вредна станува за своите партнери. Унија што е свртена кон надвор и отворена кон светот – рече кипарскиот претседател Христодулидес при презентирањето на програмата на претседателството.