Кошаркарската федерација на Македонија претходно веќе потврди дека ќе бидеме домаќини на Европското првенство до 16 години од „Б“ дивизијат, а сега познати се и повеќе детали.

Како што информираа од федерацијата, покрај Скопје натпревари од првенството ќе се играат и во Гевгелија.

„Во насока на дополнителна промоција на кошарката и нејзино доближување до што поголем број љубители на спортот, Кошаркарската федерација донесе одлука ова првенство, за првпат, да се реализира во два града – Скопје и Гевгелија.

Досега, вакви и слични меѓународни настани традиционално се организираа во главниот град, но нашата цел е да ја прошириме кошаркарската енергија и во другите средини, истовремено овозможувајќи им на повеќе граѓани да бидат дел од едно големо европско спортско доживување.

Изборот на Гевгелија претставува можност овој град да се претстави во вистинско светло – како одличен домаќин, со својата спортска инфраструктура, гостопримство и организациски потенцијал.

Убедени сме дека, заедно со Скопје, Гевгелија ќе придонесе за успешно и достоинствено организирање на шампионатот на највисоко европско ниво“, соопшти КФМ.
На ова Европско првенство ќе учествува и Македонија, а ќе се игра од 5 до 16 август.