Во голема полициска акција во Црна Гора, уапсени се голем број поранешни и активни припадници на полицијата кои, според властите, биле на платниот список на озлогласениот Кавачки клан. Со ова, велат црногорските истражни органи, се потврдиле наводите кои земјата ги добиваше од Интерпол – дека Кавачкиот клан имал силно упориште во безбедносните служби, дотолку што речиси може да се каже дека криминалците имале контрола врз црногорската полиција.

Припадниците на овој криминален клан со години се во отворен конфликт со ривалскиот Шкаљарски клан, а војната остави десетици мртви во Црна Гора, Србија, но и ширум Балканот, Европа и светот.

„Кавачкиот клан е во врвот на полициската управа и се надевам дека на чело на таа организирана криминална група конечно ќе бидат кривично гонети“, изјави денеска техничкиот премиер Дритан Абазовиќ коментирајќи ги апсењата од Вашингтон, каде е во официјална посета.

Многупати, додава Абазовиќ, истакнувал дека организираниот криминал владее со Црна Гора. „Нашето јавно ветување дека ќе се ослободиме од него се исполнува секој ден“, вели тој.

На прашањето дали има информации за најавените нови апсења на високи полициски функционери, тој одговори дека не може да одговори на тоа прашање, но дека е исклучително горд на постапките на Специјалното државно обвинителство и на Специјалното полициско одделение.

„Ова е група насекаде околу Радоје Звицер и уште еден човек кој ме тужеше, нема да го откријам неговиот идентитет, но многу е лесно да се погоди за кого се работи. Но, ниту еден од нив не можеше да ги достигне овие височини, ако не беше политичката заштита на режимот кој падна во 2020 година. Затоа сме мета на секој напад – не поради политика или идеологија, туку затоа што разоткривме еден од најголемите наркокартели во Европа, кој работи со поддршка не само на полицијата, туку и на повисоки политички структури“, рече Абазовиќ.

Според властите, од комуникациите што некои од нив ги имале преку шифрирани телефони, се дознава дека полицајци учествувале во киднапирање луѓе, кои ги држеле во посебни простории, ги тепале, им ставале пиштол во уста, ги мачеле со струја, ги гушеле, им се заканувале и ги омаловажувале, пишуваат медиумите. Уапсените ќе бидат гонети за злосторничко здружување, меѓу другото.

Петар Лазовиќ и Југослав Југо Раичевиќ, кои се меѓу обвинетите, разговарале за тоа со шефовите и членовите на криминалните групи и често им испраќале фотографии од луѓе кои се измачувани. Според досега разгледаните материјали на Европол, Лазовиќ ги известувал криминалните босови Радоје Звицер, Дарко Шариќ, Никола Спасојевиќ, Вељко Беливук и Марко Миљковиќ.

Петар Лазовиќ е во притвор од јули минатата година. Тој е син на поранешниот помошник-директор на Полициската управа Зоран Лазовиќ и за него беше понудена милионска кауција за да излезе од затвор. Неколку понуди од неговите адвокати беа одбиени од судот.