Италијанскиот моден бренд „Долче и Габана“ соопшти дека соосновачот Стефано Габана се повлекол од функцијата претседател на компанијата на почетокот на 2026 година, пишува „Гардијан“.

Како што наведуваат од модната куќа, оставката стапила на сила на 1 јануари и претставува дел од „природна еволуција на организациската структура и управувањето“.

Сепак, од компанијата потенцираат дека оваа одлука нема влијание врз креативната работа на Габана, кој и натаму ќе биде вклучен во дизајнерските процеси.

Нов претседател стана Алфонсо Долче, брат на Доменико Долче и извршен директор на компанијата.

Според информации од медиумите, Габана размислува и за иднината на својот удел од 40 проценти во компанијата, во пресрет на разговорите со банките и кредиторите.

Модната куќа, основана во 1985 година, се соочува со предизвици поради падот на луксузниот пазар, дополнително засилен од глобалните економски неизвесности и случувањата на Блискиот Исток, кој е значаен пазар за вакви брендови.

Во март, компанијата ангажирала финансиски советник во подготовка за преговори со доверителите, а според достапните податоци, долгот изнесува околу 450 милиони евра.

Инаку, „Долче и Габана“ низ годините беше во центарот на повеќе контроверзии, вклучително и обвинувања за расизам и хомофобија, што влијаеше врз имиџот на брендот на глобално ниво.

Бела Хадид го искритикува „Долче & Габана“ за расизам на Модната недела во Милано: „Срамно е што брендот сè уште има поддршка“