Во Културно-информативниот центар – Скопје, на 15 јули, во 20 часот, во изложбениот салон „Империјал 2“ ќе се одржи отворањето на изложбата на фотографии со наслов „Помеѓу моментот пред и моментот потоа“ од Евангелија Иваноска.

Изложбата на Евангелија Иваноска е серија на фотографии кои ловат длабоко мисловно искуство во миг кој ни ја буди љубопитноста. Искуството толку интригира што успева целосно да го задржи нашето внимание и го доживуваме со силна посветеност, а најчесто трае само секунди. Моментот пред и моментот потоа остануваат заборавени додека доживуваме.

Фотографиите документираат вистински и обични човечки настани низ око кое го романтизира животот. Тие поетично набљудуваат минливи моменти со широк спектар на емотивни тонови: игриви, замислени, тивки и интимни човечки интеракции. Збирот содржи моменти како… Дедо и дете во „борба“ за сладолед… Унгарски танчари кои седнале да одморат, но се толку сериозни што изгледаат на ликови од некој Вестерн… Патници на воз појден накај Барселона, маѓепсани од сјајот на морето… Па така, публиката е вовлечена во мисла и емоција. Фотографиите во склоп на изложбата се создавани во периодот од 2016 до денес.

– Евангелија Иваноска со својата прва самостојна изложба на фотографии со загадочен наслов – „Помеѓу моментот пред и моментот потоа“, се појавува на македонската фотографска сцена како тивок револуционер, трансформирајќи го баналното во возвишено со хируршка прецизност на својот објектив.

Нејзините фотографии се „маскирани“ како документарни хроники, но под површината врие емотивен вулкан што ги претвора секојдневните моменти во визуелна поезија. Монохромната палета не е само естетски избор, туку филозофски манифест – во светот заситен со дигитална какофонија на бои, таа ги дестилира чувствата до нивната најчиста есенција. Композициите пулсираат со математичка совршеност, каде што секоја линија е на вистинското место, а секоја нијанса од сивите валери носи тежина на недоречените приказни.

Во ерата на хипер-поврзаноста, нејзините фотографии функционираат како медитативен храм каде што времето се кондензира во кристални моменти на вечност. Нејзините фотографии не само што ја замрзнуваат реалноста – тие ја препишуваат, откривајќи ги скриените наративи што танцуваат меѓу светлината и мракот. Младата фотографка владее со алхемијата на трансформацијата, претворајќи го прозаичното во сакрално со едно чкрапање на фотоапаратот.

Оваа изложба не е само дебитантски чекор, туку интелектуален манифест кој го провоцира современиот визуелен дискурс. Иваноска го дефинира новиот фотографски јазик каде што тишината ечи погласно од најзвучните бои. Во нејзините рамки се раѓа еден нов поетски универзум каде што секојдневието станува епифанија, а баналноста се претвора во трансцендентност – истакнува фотографот Драги Неделчевски.

Евангелија Иваноска е графички дизајнер со интензивна љубов кон фотографијата и сликарството. Таа фотографира од 12-годишна возраст година (2013 година), започнувајќи со интерес во макро фотографија. Нејзиниот досегашен опус најобемно покрива улична фотографија и помал број на портрети, архитектура и природа.

Евангелија е член на Фото сојуз на Македонија и Фотогрупа „Чкрап!“ во Тетово и изложува фотографии на годишните групни изложби (2022, 2023, 2024) на „Чкрап!“. Љубовта кон графичкиот дизајн ја влева во промоцијата на клубот, а во 2024 година станува член на организаторскиот тим на „Чкрап!“.

Нејзините фотографии се објавени во 15 написи на Европската агенција за животна средина (European Environment Agency), а со уличните фотографии учествува во рубриката #НизТвојотОбјектив на Радио МОФ. Во меѓувреме, Евангелија се посветува на љубовта кон танцот, гурманската храна и дизајн полн со човечност и експресија. Нејзината изложба во КИЦ – Скопје ќе биде отворена до 4 август годинава.