Изложба на дела во мал формат на Костадин Батев ќе биде претставена во Струмица
Здружението за развој на културата и заштита на културното наследство „Контекст – Струмица“ во соработка со кафе бар „Нагоре“, како дел од неформалниот тековен концепт-проект #ЅидНаУметноста, оваа сабота, 6 април 2024 година, во 21 часот, ќе ја отвори изложбата на дела во мал формат насловена „10во12“ на ликовниот уметник Костадин Батев.
– Во изборот насловен „10во12“ ќе видиме 12 дела изработени во мал формат изминативе 10 години. Тие претставуваат своевиден пресек на една декада творење на Костадин Батев и претставуваат целина од неколку засебни минијатури, графики и акварели кои коегзистираат и како засебни единки и како целина.
Костадин Батев е познат на струмичката публика, неговото творештво е веќе дел од колективната меморија на струмичките колекционери и љубители на уметноста, тој како учесник на Меѓународната ликовната колонија и со своја самостојна изложба веќе ги има претставувано своите сликарските светогледи пред своите сограѓани.
Големиот формат кој е вообичаена работна површина за одомаќинување на разновидните претстави од имагинативниот свет на Батев се импозантни, неговиот стил на сликање е автентичен, не само во рамките на македонската ликовна сцена, туку и пошироко.
Во овие дела во мал формат, внимателно одбрана селекција за изложбата „10во12“, имаме уникатна прилика да го погледнеме, доживееме и препознаеме интимното илустрирање на внатрешните карпатести пречекорувања, премостувања на Батев, метаморфозирањето на емотивната потреба од преобмислување и редефинирање на спознаеното, тивок божествен восклик, но и деконструирање на традиционалните доживувања на формата, специфична фигуративност облеана со силен колорит, жестоки движења при создавањето и сурови и груби, но сепак маркантни потези кои симболизираат сигурност при формирањето на неговите ликовни светови – напиша Митко Гогов во освртот кој изложбата со наслов „Колоритна бура од емоции или премрежја во космосот“.
Костадин Батев е роден 1979 година во Струмица. Средно училиште завршил во УПУ „Лазар Личеновски“ – Скопје во 1997 година, а во 2004-та година дипломира на ФЛУ, отсек сликарство со графички дизајн во класата на проф. Вело Ташовски. Член на ДЛУС од 2000-та година, а зад себе има шест самостојни изложби и голем број групни изложби и ликовни колонии.