Излезе нов број на периодичното списание за литература, уметност и култура „Стремеж“

Новиот број на списанието за литература, уметност и култура „Стремеж“ број 1 за 2021 година тематски е посветен на одбележувањето на 100-годишнината од раѓањето на великаните Блаже Конески и Коле Чашуле. Во рубриката „Разговор со Конески“ објавени се прегледи, студии, осврти и сеќавања на творештвото и ликот на Конески од авторите Катица Ќулавкова, Санде Стојчевски, Димитар Пандев/Марија Пандева, Миле Спирковски, Игор Поп Трајков и Снежана Каратошеска.

Застапена е и поезија и проза на повеќе автори, кои со почетните текстови се обраќаат на Конески и неговото дело: Христо Петрески, Филиз Мехметоглу, Весна Ацевска, Љубица Трајкоска, Мирјана Недева и Тања Аждаја.

Во рубриката „Дијалози со Чашуле“ читателите можат да го прочитаат првпат и постхумно објавениот расказ на Коле Чашуле „Незабошотеното кафе“, како и анализи и записи за неговото драмско творештво од авторите Ацо Гогов, Ана Стојаноска, Иво Митев-Жиле и Каролина Мицевска, како и книжевни текстови инспирирани од неговиот лик и дело на Сузана Ѓорѓиевска и Сашо Димоски. Рубриката „Поезија“ го претставува поетскиот циклус „Поле на волшепства“ на поетот академик Влада Урошевиќ, додека во рубриката „Златен венец на СВП“ застапена е поезија на поетесата Керол Ен Дафи.

Рубриката „Препеви, преводи“ донесува прва објава на македонски јазик на поезијата на турскиот поет Метин Елоглу во препев на Филиз Мехметоглу, а исто така и песни од новиот италијански глас, младиот поет Џерардо Масучо препеани од Наташа Сарџоска. Во рубриката „Критики, есеи, студии“ објавен е есејот „Силјан Штркот како втемелувачки национален наратив“ на Елизабета Шелева.

Списанието „Стремеж“ го издава Центарот за култура „Марко Цепенков“ од Прилеп со поддршка на Министерството за култура.

(Текстот е објавен во „Културен печат“ број 91, во печатеното издание на „Слободен печат“ на 31 јули – 2 август 2021)

Видео на денот