Пожарот што избувна денеска околу пладне на дел од напуштената галија „Среќа“ лоцирана во Вардар кај хотелот „Холидеј ин“ е изгаснат. Во пожарот нема повредени лица, а причината ќе се утврдува дополнително.

Со брзата интервенција на три противпожарни екипи на Противпожарната бригада на Град Скопје е изгаснат пожарот во галијата. Засега причината е непозната, но нема довод на електрична енергија, а има поголема количина на смет. Причината е најверојатно човечки фактор рече командантот на противпожарната бригада, Звонко Томески во изјава за медиумите.

Тој објасни дека дојавата за пожар ја добиле во 13.01 часот и веднаш излегле на терен.

Возилата се пристигнати се во 13.05 часот, интервенирано е брзо, спречено е проширување на пожарот кој имаше зафатено дел од Галијата, односно надворешниот дел од предниот дел и внатрешно, каде што имаше депонирано поголема количина на смет. Интервенирано е брзо, пожарот е брзо ставен под контрола, рече Томески.