За дванаесет дена заврши истрагата за трагичната сообраќајка на крстосницата пред „Сити мол“, каде загина 24-годишната радовишанка Викторија Николова, а повредено беше нејзиното момче Леонид Даов, објави „А1он“.

Периодот од 20 јануари кога се случи сообраќајката до 2 февруари, кога според адвокатот на возачот е архивирано барањето, бил доволен да се соберат сите докази. Адвокатот на возачот, Душко Јанковиќ, во изјава за порталот тврди дека иако формално е завршена, истрагата не е целосна.

Возачот на автомобилот кој на пешачки премин удри во девојката, Јордан Ѓ., е во притвор поради опасност од бегство и влијание врз сведоци.

Од Обвинителството не одговараат дали се завршени и сите распити со сведоци, обвинетиот, како и со неговата придружба во автомобилот.

„А1он“ дознава дека е завршено сообраќајното вештачење, кое треба да даде информации за тоа како настанала несреќата и со која брзина Јордан удрил во Викторија.

„Истражната постапка е во завршна фаза, односно обвинителот заврши со преземање на истражните дејствија и сега тече законскиот рок во кој одбраната и осомничениот имаат право да извршат увид во доказите и да предложат преземање дополнителни дејствија. Веднаш штом ќе биде донесена конечна јавнобвинителска одлука, јавноста ќе биде известена за утврдените факти во истрагата“, велат од Обвинителството.

Според адвокатот Јанковиќ, ова е чувствителен предмет и тој смета дека периодот од 12 дена е прекраток и дека истрагата е некомплетна.

Сообраќајката ја потресе македонската јавност, а неколку дена по неа, на местото на несреќата беше организиран протестен собир против сообраќајното насилство.