Иранскиот министер за надворешни работи Абас Арагчи денеска ги отфрли американските разузнавачки извештаи за воената моќ на нацијата, тврдејќи дека инвентарот на проектили и лансери на Техеран се зголемил на 120 отсто од неговиот предвоен капацитет, што е повеќе од бројката од 75 отсто што неодамна ја наведе ЦИА, објави „Туркије тудеј“.

Тој ги обвини САД за постојана саботажа на дипломатијата преку употреба на воена сила, само неколку часа откако иранските и американските сили разменија оган во близина на Ормускиот Теснец.

„Секогаш кога има дипломатско решение на маса, САД се решаваат за непромислена воена авантура. Дали е тоа груба тактика на притисок? Или е резултат на ‘расипувач’ кој уште еднаш го мами американскиот претседател во нова кал? Без разлика на причините, исходот е ист: Иранците никогаш не потклекнуваат под притисок, а дипломатијата е секогаш жртва“, напиша Арагчи на „Икс“.

Потоа тој директно се осврна на проценката на ЦИА.

„ЦИА греши. Нашиот ракетен инвентар и капацитет на лансери не е на 75 отсто во споредба со 28 февруари. Точната бројка е 120 отсто. Што се однесува до нашата подготвеност да го браниме нашиот народ: таа е 1.000 отсто“, додаде тој.

Иран и Америка се натпреваруваат во водење инает

Директно побивање на наодите на ЦИА

Изјавата на Арагчи беше директен одговор на извештајот на „Вашингтон пост“ објавен вчера, кој цитира четири луѓе запознаени со доверливата проценка на ЦИА доставена до Белата куќа, во која се заклучува дека Иран задржува приближно 75 отсто од своите предвоени инвентари на мобилни лансери и околу 70 отсто од своите предвоени залихи на проектили.

Во проценката се наведува и дека Иран ги обновил и повторно ги отворил речиси сите свои подземни складишта, поправил дел од оштетените проектили и составил нови кои биле во завршна фаза пред почетокот на војната.

Трамп, пак, одделно во Овалната соба тврдеше дека иранските проектили се „речиси десеткувани“ на 18 до 19 отсто, бројка со која очигледно се коси и проценката на ЦИА.

Арагчи оди уште подалеку

Тврдењето на Арагчи за 120 отсто оди уште подалеку, сугерирајќи не само дека Иран го задржал својот арсенал, туку и дека тој е проширен над предвоените нивоа.

Овие изјави доаѓаат откако американските сили нападнаа ирански нафтен танкер во близина на пристаништето Јаск, што ја поттикна иранската морнарица да изврши масивен напад со проектили и дронови врз три американски разорувачи кои минуваа низ Ормускиот Теснец. Американските сили потоа ги нападнаа иранските крајбрежни локации на југот од земјата.

Трамп ја опиша размената на оган како „мала шлаканица“ и рече дека примирјето останува во сила.

Израел од петни жили сака да спречи мир меѓу Америка и Иран