Ал-Кадими: Уапсен висок водач на џихадистичката група ИД и оперативец на Ал Каеда

Ирачкиот премиер Мустафа ал-Кадими / Фото: Архива

Ирачките власти соопштија дека висок водач на џихадистичката група Исламска држава и долгогодишен оперативец на Ал Каеда, Сами Јасим бил уапсен во прекугранична операција.

Веста ја објави на Твитер ирачкиот премиер Мустафа ал-Кадими, кој истакна дека тоа била една од најтешките прекугранични разузнавачки операции, спроведени од ирачките безбедносни сили.

Стејт департментот, во рамки на програмата Награди за правда, понуди пет милиони долари за „главата” на Јасим и го претстави како клучна фигура за управување со финансиите за операциите на ИД.

Додека бил заменик лидер на ИД во Мосул во 2014 година, Јасим, наводно, бил еквивалент на министер за финансии на ИД, кој ги надгледувал приходите од илегалната продажба на нафта, гас, антиквитети и природни ресурси.

Претставници на ирачките разузнавачки служби изјавија дека Јасим бил уапсен во друга земја и бил префрлен во Ирак пред неколку дена.

Јасим работел со водачот на Ал Каеда во Ирак, Абу Мусаб ал Заркави, јордански оперативец, кој беше убиен во американскиот воздушен напад во Ирак во 2006 година.

Извор: МИА

Видео на денот