Поп-пејачката Теа Трајковска неодамна ја промовираше ноовата песна „Не ми троши време“, инспирирана од лични моменти и поставување граници. Со Теа зборуваме за процесот на создавање на песната и видеоспотот, за тоа како преку музиката ја враќа својата самопочит, како се справува со јавниот притисок, но и за празничните традиции, патувањата што ја инспирираат и идните музички проекти.

Песната „Не ми троши време“ е инспирирана од твоите лични моменти и поставување граници. Кој беше најважниот момент што те мотивираше да ја напишеш?

– Најважниот момент беше кога сфатив дека постојано давам повеќе отколку што добивам и дека тоа ме исцрпува. „Не ми троши време“ се роди од таа јасна одлука да си ја вратам контролата на својот живот, да кажам „доста е“ и да бидам искрена со себе. Во песната, иако е лична, верувам дека многу луѓе ќе се препознаат и дека им се случило нешто слично.

Како би го опишала чувството кога ја враќаш својата самопочит преку музика?

– Ослободувачко. Музиката ми е најчистиот начин да ги изразам емоциите и кога преку неа ги канализирам сите работи што ми се случуваат, па чувството е како да застануваш цврсто на свои нозе. Тоа за мене беше момент кога си мирен со себе, свој на своето и знаеш дека си на вистинската страна и пат.

Видеото прикажува љубовна приказна со Петар Стојанов. Што беше најголемиот предизвик при снимањето на ова видео?

– Снимањето одеше многу полесно отколку што очекував. Петар е врвен и исклучително професионален актер, што многу ми помогна и мене да бидам опуштена пред камера. Кога работиш со некој што точно знае што прави, автоматски се создава сигурност и простор емоцијата да излезе природно. Приказната е суптилна и бараше многу внимание на деталите и на хемијата меѓу ликовите. Со Петар работевме ептен лабаво, што ни помогна приказната да изгледа искрено и реално. Голем поздрав и до Никола Наумовски, кој стои зад видеото и кој го долови сето тоа да изгледа така како што излезе на крај.

Песната зборува за граници и мир. Како го одржуваш својот личен мир во секојдневието, особено кога си под јавен притисок?

– Учам да бидам селективна, со луѓе, со обврски, со енергија. Не одговарам на сè и не се објаснувам секогаш. Мирот ми е приоритет и кога ќе го поставиш така, многу полесно се справуваш и со јавниот притисок.

Како ќе ја прославиш празничната сезона оваа година? Имаш ли некоја традиција што ти е посебно важна?

– Празниците ги поминувам дома, со најблиските, тоа ми е најважната традиција. Елката ми е розова, со розови лампиони и светилки, а искрено целиот стан ми е накитен во розово, токму како вистински „женски“ стан. Ме исполнува и ми прави некоја посебна празнична атмосфера.

Колку зимата влијае врз твојата инспирација? Дали си од оние што го сакаат снегот?

– Зимата ми е едно од омилените годишни времиња, но најмногу ја сакам кога сум на планина и во снег, не кога сум во град и се мачам да вклучам автомобил на ладно (ха-ха). Обожавам да скијам и едвај чекам да одам на зимување. Воедно, во овој период подготвувам и музички проект што ќе излезе доцна во јануари, така што оваа зима ми е и многу инспиративна и креативна.

Позната си по честите трансформации на изгледот. Колку уживаш во тоа и дали овие промени се одразуваат и во твојата музика?

– Многу уживам во трансформациите, затоа што изгледот за мене е уште еден начин на изразување. Секоја промена доаѓа природно, како одраз на мојата енергија во тој период, а тоа се чувствува и во музиката што ја создавам.

Дали патувањата ти носат инспирација за песни или видеоспотови? Кое место последно остави најсилен впечаток на тебе?

– Патувањата секогаш ми носат инспирација. Најубав спомен ми се патувањата во Париз, каде што имав можност да посетам концерти на моите два омилени бендови од детството – „Фол Аут Бој“ и „Паник! Ат Де Диско“. Секогаш најсилен впечаток ми остава патување што е поврзано со музика бидејќи таа е мојата најголема љубов.

Работеше со многу артисти и професионалци. Кој момент од соработките со колегите ти остана највпечатлив и зошто?

– Последните два дуети – со Таско и со „ДНК“ ми се дефинитивно најдраги. Особено сум благодарна за дуетот „Амајлија“ со „ДНК“, кој ми остана како вечен спомен за нашето огромно пријателство и беше препознаен како апсолутен хит кај публиката.

Идни проекти и планови за Новата година – што можеме да очекуваме од тебе?

– Наскоро пристигнува уште една нова песна, а со голема радост можам да најавам и нешто што долго го посакував, конечно нов албум во 2026 година. Следува период полн со нова музика и искрени приказни.