Најтрофејниот македонски автомобилист Игор Стефановски – Иџе продолжува да реди успеси и на меѓународната сцена, откако триумфираше на ридско-брзинската трка во Котор, која важи за една од најатрактивните во регионот.

Во паузата меѓу настапите во ФИА Европскиот шампионат на ридски патеки, Стефановски ја прифати поканата на организаторите и уште еднаш ја потврди својата доминација, освојувајќи го првото место во силна конкуренција од 134 натпреварувачи.

Трката беше во организација на Автомобилскиот и картинг сојуз на Црна Гора и АМСК Котор, а има посебна тежина бидејќи носи бодови за повеќе натпреварувања, меѓу кои шампионатот на Црна Гора, првенството на Хрватска, како и Адриатик и Котор куповите.