И партијата ГРОМ попладнево го соопшти својот кандидат за претседател, а тоа е Стевче Јакимовски, актуелниот градоначалник на Општина Карпош.  Одлуката беше соопштена по одржаната средба на Централниот одбор.

Попладнево и СДСМ соопштија дека на претстојните претседателски избори повторно ќе застанат зад Стево Пендаровски. Предлогот за Пендаровски во наредните денови ќе се најде и пред членовите на Централниот и на Извршниот одбор на СДСМ, а по најавените средби со коалициските партнери, е планирана и официјална конвенција за негова промоција на 3 март.

Гордана Силјановска Давкова, пак, ќе биде претседателскиот кандидат на ВМРО-ДПМНЕ. Таа, според извори во партијата, била единствена која се пријавила на огласот кој бил отворен до попладнево во 17 часот. Дали Силјановска по вторпат ќе влезе во претседателската трка, ќе се знае по партиската конвенција на 2 март, кога постои можност и друг кандидат да биде предложен од делегатите.

Демократската Унија за Интеграција (ДУИ) најави дека утре ќе го соопшти својот кандидат. Досега во јавноста се познати и кандидатурите на Арбен Таравари од албанскиот опозициски блок, Билјана Ванковска од Левица и Вело Марковски како независен кандидат.

Пендаровски ќе се трка за втор мандат, раководството на СДСМ попладнево му дало поддршка

Силјановска Давкова ќе биде кандидатот за претседател на ВМРО-ДПМНЕ