Хрват им го скршил телевизорот и „Плејстејшнот“ на внуците, многу вревеле
37-годишен Хрват е прогласен за виновен откако ја скршил вратата од влезот на неговиот брат, а потоа и телевизорот и конзолата „Плејстејшн“ на неговите внуци, во напад на бес.
Инцидентот се случил во март, кога во куќата во Загреб, во која живеат двете семејства, децата играле „Плејстејшн“, а на нивниот чичко му пречела вревата што ја правеле, бидејќи сакал да спие, пишува „Даница.хр“.
Судот констатира дека чичкото извршил психичко насилство врз внуките, стари 18 и 16 години, и 11-годишниот внук.
„Тој дошол во станот во кој живеат со неговиот татко, кој во моментот не бил дома, и ја скршил влезната врата, влегол во внатрешноста каде го скршил телевизорот во дневната соба и конзолата „Сони Плејстејшн“, пишува во пресудата.
„Неговите внуци почувствувале страв и вознемиреност, поради што извршил психичко насилство во семејството на штета на децата, при што сторил прекршок по Законот за заштита од семејно насилство“, заклучи судијата.
На осудениот загрепчанец му е изречена условна затворска казна во траење од 45 дена и заштитна мерка забрана за вознемирување на жртвите.