Повеќе луѓе биле нападнати од алигатори низ централна Флорида во текот на изминатата недела, а во последниот напад загинала 31-годишна жена, пренесува Си-ен-ен.

Сериозните средби со алигатори и понатаму се релативно ретки, покажуваат податоците на Комисијата за заштита на рибите и дивиот свет на Флорида (FWC), но во последните седум дена се регистрирани три напади. Два од нив се случиле во период од само 24 часа.

Последната жртва во неделата попладне застанала да плива со своето момче и пријател во реката Еконлокхачи, северно од Орландо, кога била нападната од алигатор.

„Нејзиното момче се обидело да ја извлече од челустите на алигаторот“, соопштија надлежните.

Лицето кое повикало брза помош ги опишало нејзините повреди како „страшни“. Жената била касната на двете раце, а починала откако била пренесена во болница.

Припадниците на Комисијата на местото на нападот фатиле алигатор долг речиси четири метри (13 стапки), како и уште еден долг околу 3,7 метри (12 стапки), наведувајќи дека еден од нив најверојатно е одговорен за нападот.

„Овде сум видела навистина големи алигатори. Но никогаш не сум слушнала дека некој бил нападнат“, изјавила планинарката Леја Виера.

Само еден ден претходно, момче кое ловело риба со својот татко во рибарскиот камп Нелсон во округот Мерион било каснато за раката од алигатор.

Уште еден напад се случил на 21 јуни, кога алигатор каснал нуркач со маска во реката Рејнбоу, во истата област, околу 160 километри од местото на смртоносниот напад во округот Семинол.

Властите по тој напад привремено ја затвориле реката сè додека службите за заштита на дивиот свет не го пронашле и отстраниле алигаторот, соопшти Канцеларијата на шерифот на округот Мерион.

Според локалните медиуми, таму бил фатен и успиен алигатор долг околу 2,6 метри, кој го каснал момчето.

Колку се чести нападите од алигатори?

Иако на Флорида живеат околу 1,3 милиони алигатори, нападите врз луѓе се ретки.

Според податоците на Комисијата за заштита на дивиот свет на Флорида, во оваа сојузна држава во просек годишно се случуваат околу осум непредизвикани каснувања од алигатори. Комисијата спроведува и програма за постапување по пријави за алигатори за кои се смета дека претставуваат закана за луѓето, домашните миленици или имотот.

Од 1948 година на Флорида се регистрирани повеќе од 450 напади од алигатори, од кои само 30 завршиле со смртен исход.

Минатата година биле регистрирани 13 напади, вклучувајќи и два со смртен исход.

Осум луѓе се здобиле со тешки, а пет со полесни повреди.

Истражување на Универзитетот на Флорида и Центар колеџот во Кентаки покажало дека активности со низок ризик, како што се прошетка покрај вода или престој на брегот, ретко доведуваат до напад.

Најголемиот број смртоносни напади се случиле по ризично однесување, како намерно влегување во води за кои е познато дека се живеалиште на алигатори.

„Секој што е свесен за својата околина и носи информирани одлуки, особено за време на рекреативни активности во подрачја каде што живеат алигатори, може да помогне во заштитата и на луѓето и на дивите животни“, изјавил професорот по екологија на Универзитетот на Флорида, Френк Макоти, еден од авторите на студијата.

Според него, многу каснувања можат да бидат спречени „доколку луѓето обрнуваат внимание на својата околина и избегнуваат ризично однесување“.

Маж фрлил тригодишно дете во езеро со крокодили во британска зоолошка градина