Ниту една фирма не се јавила на тендерот што беше објавен за набавка, монтажа и пуштање во работа на систем за компримиран воздух од кој зависат сите хируршки клиники во Клинички центар. Тие со месеци работат со надворешни компресори, кои во два наврати откажале – еднаш за време на операција на дете, а вториот пат кога бил опериран болен од карцином.

Информацијата дека тендерот пропаднал, за „Слободен печат“ ја потврдија од Службата за заеднички работи при Клинички центар. На 28 јуни тие распишале тендер а фирмите имале краен рок да достават понуди до вчера во 11 часот.

Проценетата вредност на постапката беше 18.644.068 денари без ДДВ. Во тендерската документација беше предвидена задолжителна посета на локација заради важноста на самата набавка за здравјето и безбедноста на пациентите.

Посета на локација побараа три економски и на истите им беше овозможено посета на локација. За нас од непознати причини до денот на отворање не е пристигната ниту една понуда.

Заради напред наведеното денес од страна на Јавната установа од областа на здравството донесена е одлука за поништување на постапката, известени се Министерството за здравство и Владата и побарани се натамошни насоки за постапување, велат за „Слободен печат“ од Јавна установа од областа на здравството за потребите на ЈЗУ УК, завод и ургентен центар Скопје.