Поранешниот косовски претседател Хашим Тачи се изјасни за невин по сите точки од обвинението на почетокот на неговото судење за воени злосторства пред специјалниот суд во Хаг. „Го разбирам обвинението и целосно сум невин“, им порача Тачи на судиите.

Специјалниот суд за воени злосторства на Косово, со седиште во Хаг, го обвини Тачи во ноември 2020 година за воени злосторства и злосторства против човештвото, вклучително и прогон, убиства, тортура, присилно исчезнување и други злосторства извршени за време на борбата за независност.

54-годишниот поранешен претседател и поранешен лидер на Ослободителната војска на Косово (ОВК) поднесе оставка од функцијата шеф на државата веднаш по подигнувањето на обвинението и пријавен во притворската единица на судот во Хаг. Тројца од неговите најблиски соработници, вклучително и двајца поранешни претседатели на парламентот, се соочуваат со истото обвинение.

Покрај Тачи, во обвинението се вклучени и поранешните високи команданти на ОВК и политичари Кадри Весели, Јакуп Красниќи и Реџеп Селими. Сите четворица беа обвинети за „заеднички злосторнички потфат во кој беа извршени масовни, систематски напади“ врз српските цивили на Косово и косовските Албанци кои беа политички противници на ОВК.

Неколку илјади луѓе протестираа во неделата во Приштина за поддршка на поранешниот претседател и тројцата сообвинети. За нив поранешните герилци се „херои“.