Гувернерот на Калифорнија, демократот Гевин Њусом, во интервју емитувано вчера на Си-би-ес изјави дека размислува да се кандидира за претседател во 2028 година, но ќе одлучи по среднорочните избори во 2026 година.

Њусом оваа година презеде чекори за да размисли дали би можел да се кандидира за номинација од Демократската партија и се појави како истакната фигура во партијата, соочувајќи се со претседателот Доналд Трамп по голем број прашања.

„Со нетрпение очекувам да видам“ кој ќе се кандидира за претседател кога ќе дојде време, изјави Њусом за емисијата „Sunday Morning“ на Си-Би-Ес. На прашањето дали размислува за тоа, тој рече: „Да, би лажел ако кажам поинаку“.

Трамп има уставно ограничување да се кандидира за трет мандат, но тој не го исклучил тоа. Порано оваа година, тој рече дека „постојат начини на кои би можел да го стори тоа“.

Њусом ја стави Калифорнија во преден план на напорите на демократите за прекројување на изборните единици за да се спротивстават на сличните напори во државите контролирани од републиканците, додека двете партии се обидуваат да обезбедат контрола врз Претставничкиот дом на изборите во 2026 година. Републиканците моментално имаат тесно мнозинство во тој дом.

Гувернерот, исто така, се судри со Трамп околу неговата одлука за распоредување трупи во Лос Анџелес.

Трамп ја исклучува можноста да се кандидира за потпретседател во 2028 година