Групната изложба „На изворот на Климент и Наум“ ќе биде поставена во КИЦ-Скопје
Во Културно-информативниот центар во Скопје, во Продажен ликовен салон, на 13 декември ќе биде отворена групната изложба „На изворот на Климент и Наум“ од колекцијата на Климе Коробар со дела каде Свети Климент и Свети Наум Охридски се творечка инспирација на сликарите, музичарите, копаничарите и поетите.
– Од 910 до 2023 година поминале единаесет столетија, но тоа временско растојание не ја избледило нашата меморија. И по толку столетија ние сме пак на она големо Сега, на изворот на Словото и Светлината што блика од наследството што ни го оставија Климент и неговиот собрат Наум. Тоа е духовно тело толку големо што добило димензии на безвременост и безименост, на нешто кое своето време и име ги растворило и втиснало во вечноста и просторот на колективната душа – стои во најавата на изложбата.
Свети Климент и Свети Наум Охридски се отворена тема и мотив, секогаш длабоко инспиративен и благороден за творечка креација, затоа што преку нивната светлина уште повеќе се зацврстува нашиот идентитет и алките на нашиот духовен континуитет.
Создадените дела на еминентни македонски уметници говорат за зацврстувањето на корените, почитта и пиететот кон делото на Свети Климент и Свети Наум Охридски, кои се еден од најмоќните столбови на нашето постоење и идентитет.
На изложбата ќе бидат застапени дела на Васко Ташковски, Глигор Чемерски, Благоја Дрнков, Петар Хаџи-Бошков, Симон Шемов, Павле Кузмановски, Петар Попчев, Владимир Георгиевски, Стефан Хаџи-Николов, Доне Миљановски, Ставре Димитров – Стадим, Илија Аџиевски, Димитар Малиданов, Благој Чушков, Ангеле Нацевски, Новица Трајковски и други.
Изложбата ќе биде отворена до 10 јануари 2024 година.
(Текстот е објавен во „Културен печат“ број 208, во печатеното издание на весникот „Слободен печат“ на 8-10.12.2023)