Музичка вечер исполнета со рафиниран звук, бујни емоции и уметничка енергија ќе донесе концертот на групата „Фолтин“, што ќе се одржи на 22 ноември во салата на Македонската филхармонија во Скопје. Концертот е во организација на „МГ Мјузик продукција“.

Основани во 1995 во Битола, „Фолтин“ веќе 30 години ја освојуваат публиката со својот уникатен звук и сценски израз. Нивниот стил – „псевдо-емигрантско кабаре“ – е магичен амалгам од традиционална музика, електроника, рок и елементи на кабаре и перформанс.

Со десетина албуми и музика за многубројни театарски претстави и филмови („Плати и жени“, „Исцелител“, „Медена земја“…), тие ја потврдија својата оригиналност и автентичност и дома и во светот.

На оваа специјална вечер, за првпат во салата на Македонската филхармонија, ќе бидат изведени и композиции од нивниот богат опус, кои не често се изведуваат во живо, што ќе биде неповторлива можност за сите вистински љубители на музиката на „Фолтин“.

(Текстот е објавен во „Културен печат“ број 308, во печатеното издание на весникот „Слободен печат“ на 22-23.11.2025)