Педри без дилема важи за едно од најпогодените засилувања на Барселона во последната деценија и половина. Каталонскиот гигант го доведе играчот за врска од Лас Палмас за релативно скромни 23 милиони евра, а денес неговата пазарна вредност се проценува на дури 140 милиони.

Пред трансферот на „Камп Ноу“, младиот талент бил сериозно разгледуван и од Реал Мадрид. „Кралскиот клуб“ имал можност да го донесе на „Сантијаго Бернабеу“, но на крајот се откажал од тој потег. Причината за тоа, според информациите што подоцна излегоа во јавност, бил ставот на легендата на клубот, Емилио Бутрагењо.

Ова го откри поранешниот фудбалер и тренер Пепе Мел, кој во тој период го предводеше Лас Палмас.

„Во еден разговор, Бутрагењо ми кажа дека Реал го следел Педри, но дека сметал оти не е профил на играч за Реал Мадрид“, изјави Мел.

Така, Реал пропушти можност да ангажира фудбалер кој подоцна се покажа како вистинска сензација, додека Педри заврши во Барселона и израсна во еден од најдобрите играчи за врска на светот. Денес, токму таков фудбалер му недостига на тимот на Чаби Алонсо, особено по заминувањето на Лука Модриќ и Тони Крос, по што креативноста во средниот ред значително опадна.

За разлика од тоа, Педри блеска во дресот на Барселона и игра фудбал на највисоко ниво. Во актуелната сезона тој има 19 настапи, при што постигна два гола и запиша шест асистенции, потврдувајќи дека Каталонците направиле вистински потег со неговото доведување.