Центарци покажаа колку им е важно да учествуваат во планирањето на општинските приоритети и да го креираме буџетот за 2026 година транспарентно и отчетно, со директно учество на заедницата, информира градоначалникот Горан Герасимовски по одржаниот втор буџетски форум во основното училиште „Димитар Миладинов“.

Граѓаните предложиле бројни идеи – повеќе зеленило и уредување на просторот кај Зелен пазар, санација на подземните гаражи, подобро одржување на јавните површини и урбана опрема. Во образованието била истакната потребата од реконструкција на училишни дворови, санација на покриви и подобра пристапност во училиштата, а во културата граѓаните побарале интерактивни проекти, мобилни галерии и содржини што ќе го разубават јавниот простор.

Ги информирав присутните и за субвенциите за реконструкција на фасади – поддршка од 30% со можност станбените заедници да аплицираат до 1.000.000 денари. Жителите околу Зелен пазар го поставија и прашањето за дивите пазарџии. Потврдив дека ќе има засилена инспекција и координирана акција со МВР и ДПИ за трајно решавање на овој проблем – вели Герасимовски.

Тој нагласи дека Општината ќе продолжи заедно, отворено и одговорно, да го гради буџетот што ги одразува вистинските потреби на центарци.