Граѓаните повеќе земаат потрошувачки кредити, а помалку се задолжуваат на картичка
Расте задолжувањето на граѓаните за земените потрошувачки и станбени кредити, а се намалува за автомобилските кредити, кредитните картичките, негативните салда. Притоа, годишниот раст на станбените кредити во февруари годинава, во однос на истиот месец лани, кога се уште немаше пандемија, е 12,7 проценти, додека растот на потрошувачките кредити е 6 проценти, покажуваат податоците на Народната банка.
Потрошувачките и станбените кредити во февруари покажуваат и месечен раст, односно потрошувачките кредити во февруари се зголемиле за 0,6 проценти во однос на јануари, а станбените за 1,3 проценти.
Во апсолутни бројки, пак, податоците покажуваат дека граѓаните на банките им должат 1,6 милијарди евра за потрошувачки кредити, а веднаш зад нив се станбените кредити со износ од 963 милиони евра.
Според податоците на Народната банка, граѓаните помалку посегнуваат по кредитните картички. Имено, падот на овој вид на кредитирање е 2,3 проценти во февруари во однос на ланскиот февруари, а ако се гледа на годишно ниво, во однос на ланскиот февруари, намаленото задолжување по кредитните картички е за дури 9,2 проценти.
Граѓаните помалку се осмелуваат да одат и во минус, па во февруари по овој основ се задолжиле за 9,3 проценти помалку од ласнскиот февруари.
Автомобилските кредити веќе подолго време се во пад, а во февруари годинава забележаа пад од дури 13 проценти во однос на февруари 2020 година.