Откако пред шест години се реконструираше улицата „Никола Парапунов“ во Карпош 4, кога се обнови коловозот по целата должина на улицата од околу 580 метри и се обновија само оштетените делови на тротоарите, во изминатиот период се изведува целосна реконструкција на тротоарот, односно на пешачката патека на оваа сообраќајница.

Работите ги изведуваат екипи на ЈП „Улици и патишта“ по налог на Град Скопје откаде објаснуваат дека во текот на реконструкцијата бил отстранет стариот и оштетен асфалт, поставен тампонски слој, нови рабници и вградена нова асфалтна маса, а беше извршена и дополнителна изградба на мало продолжување на постоечката површина на тротоарот.

Но, токму на поставените рабници реагираа велосипедистите од „НаТочак“ посочувајќи дека рабниците кои се поставуваат и кои се под прав агол го попречуваат движењето не само на велосипедистите туку и на мајките со бебиња во количка и на граѓаните со попреченост. Поради тоа, тие веднаш реагирале до Град Скопје.

Една од ретките позитивни работи кои станаа пракса во Скопје при реконструкциите е поставувањето на слеани рабници на пешачките премини. Но, за жал при обновување на пешачка инфраструктура на ул. „Никола Парапунов“ во Карпош 4 сведоци сме на поставување нови рабници, под агол – информираа од „НаТочак“.

Поради тоа, тие на 26 февруари испратиле допис до Град Скопје и до градоначалникот Орце Ѓорѓиевски со надеж, како што велат дека на време ќе ги ротираат поставените рабници и ќе внимаваат при сите моментални и идни работења на терен на патната инфраструктура низ Скопје.

Нивните забелешки биле прифатени и како што велат од ЈП „Улици и патишта“ одговарајќи на прашање на „Слободен печат“ во тек се активности за спуштање на големите рабници „согласно барањата на здружението „НаТочак“ со цел безбедно и непречено движење на велосипедистите“.

Исто така ве известуваме дека иако на поголем дел од пешачките и велопатеки на градските сообраќајници се спуштени рабниците, активностите за спуштање на рабниците на тротоарските површини ќе продолжат да се извршуваат и во наредниот период на сите наведени тротоарски површини за кои има барањата од  велосипедистите – велат од претпријатието.

Убаво е кога Град Скопје ги слуша потребите на граѓаните. Ваквите позитивни примери треба да бидат секојдневие во Скопје