Големо славје во Кавадарци: Тиквеш го изненади Вардар
Тиквеш слави голема победа над Вардар во ракометниот плеј-оф. Вардарци во салата „Јасмин“ беа поразени со 22:20.
Од самиот старт натпреварот беше интересен и двете екипи се менуваа во водство, меѓутоа ниту еден тим не направи повеќе од два гола разлика се до финишот кога Тиквеш поведе со три гола предност. Сепак, Вардар се врати и на паузата имаше негатива од еден гол (11:10).
Со слично темпо на игра продолжи и второто полувреме, домаќинот знаеше што сака и играше сигурно. По играта гол за гол, Тиквеш беше екипата која успеа да изгради предност.
Вардар беше во проблеми и во последните десет минути влезе со човек помалку, меѓутоа Тиквеш остана на двата гола предност од претходно и не успеа уште тука да го реши победникот. Се обидуваше Вардар, но никако не успеваше да дојде до изедначување.
Во завршницата видовме по некое промашување и на двете страни за на крајот Тиквеш да слави голема победа. За Тиквеш најефикасен беше Ани со седум гола, додека Срдановиќ и Ѓукиќ по пет постигнаа за Вардар.
Вардар со овој пораз прави голем чекор назад во битката за титулата, додека Тиквеш освои важни бодови во битката за излез во Европа.
Во претходните два натпревари кои се играа од плеј-офот денес Тинекс го победи Бутел со 20:18, додека Алкалоид лесно се справи со Струга со 22:32.