Македонската кантавторка Дина Јашари тргнува на турнеја низ постјугословенскиот простор со деби-албумот „Растенија без корен“ – точно на неговата прва годишнина. Нејзините песни, автентичен звук и органски прецизниот бенд во мај и јуни 2026 пристигнуваат во Словенија, Црна Гора, Србија и Хрватска.

На 22 мај Дина настапува во „Кино Шишка“ во Љубљана – еден од водечките центри за урбана култура во регионот, како дел од јубилејот на „Night Shifts Events Ljubljana“, организација која работи на промоција и размена на македонско-словенечката култура.

Два дена подоцна, на 24 мај, е дел од програмата на „SOWL Weekender“ во Подгорица, нов регионален фестивал за музика и природа во своето прво издание на кој ќе настапи и култниот њу-џез состав „Kyoto Jazz Massive“.

Централниот настап на турнејата е на 25 мај во Белград – точно една година откако „Растенија без корен“ беше објавен. На платото пред Музејот на Југославија, Дина го отвора 9. издание на манифестацијата „Leto u MuzeYU“, заедно со „Љубичице“ (Србија) и „Немечек“ (Хрватска), тројца добитници на наградата „Милан Младеновиќ“, која Дина ја освои уште во 2022 година со песната „Дома“. Влезот на концертот е слободен.

Во јуни турнејата продолжува на островот Крк (Хрватска), каде Дина е дел од изведувачите на „SURF Festival“ – нов јадрански фестивал во своето прво издание, со интернационална програма и атмосфера далеку од масовните фестивали.

„Растенија без корен“ е деби-албум составен од девет песни, интимен и жанровски музички дневник на Дина Јашари. Снимен на различни локации во текот на три години, со различни соработници, албумот го одбележа регионалниот музички портал „Rockomotiva“ со место во топ 5 регионални албуми за 2025 година.

Уште пред тоа, Дина ја освои наградата „Милан Младеновиќ“ за 2022 година со песната „Дома“ – регионалното признание во чест на легендарниот фронтмен на групата „Екатарина Велика“. Албумот постои како винилно издание и е достапен на сите дигитални платформи.