Кандидатот за градоначалник на Скопје од редовите на владејачката ВМРО-ДПМНЕ, Орце Ѓоргиевски, преку порака на социјалните мрежи порача дека нема да се појави на дебатата со противкандидатот од Левица, Амар Мециновиќ, договорена за вечерва на ТВ „Телма“.

Во објавата Ѓорѓиевски наведува дека вечерва во тој термин ќе биде на завршниот митинг од неговата кампања во Скопје.

Тој смета дека по претходната дебата меѓу него и Мециновиќ што се одржа во вторникот на „Канал 5“ „станале јасни ставовите“ и „јасна е сликата за двајцата кандидати“.

„Евидентно е ниското ниво на политичка култура, но и присутната безидејност и недостигот на планови кај кандидатот Амар Мециновиќ, што значи дека секоја следна дебата не би била натпревар и судир на концепти, туку судир меѓу концепт за Скопје, претставуван од мене и ВМРО-ДПМНЕ и демагогија, празна реторика и отсуство на план што се карактеристики на Амар Мециновиќ“, напиша Ѓоргиевски и додаде дека целосно ја почитува „намерата и професионалноста телевизија која испрати покана за дебата“.

Соочувањето на „Телма“ е откажано, вели Левица: „Ѓорѓиевски бега од дебата без тутор и наместени прашања“