Гитарата на која свиреше Дејв Грол во еден од првите музички спотови на „Foo Fighters“ ќе биде понудена на продажба.

Гитарата „Gretsch White Falcon“ на која Грол свиреше во музичкото видео од 1997 година за песната „Monkey Wrench“, првично била во сопственост на американскиот гитарист Пет Смир. Често се користела на нивниот втор албум „The Color And The Shape“ објавен таа година.

Се очекува да достигне цена помеѓу 17.750 и 35.500 долари кога ќе биде понудена на аукција од специјализираните музички аукционери „Gardnier Houlgate“ со седиште во Вилтшир на 7 септември.

Гитарата се продава со полароид фотографија направена од Смир од холивудската актерка Дру Баримор како свири на неа.

„Ова е многу интересна гитара бидејќи е една од ретките во сопственост на „Foo Fighters“, веројатно најголемиот рок бенд на Земјата во моментот, што некогаш излезе на јавна аукција“, посочи аукционерот Лук Хобс.

„Monkey Wrench“ беше пробивниот сингл на бендот, а воедно и првиот на кој се појави тапанарот Тејлор Хокинс, кој трагично почина во март оваа година.

„Очекувам интерес од целиот свет. Фактот што се појавува во иконското видео на бендот „Monkey Wrench“ ја прави најпривлечна за колекционерите и обожавателите“, додаде Хобс.