Гигантот од Волстрит „Морган Стенли“ забрани влез за невакцинирани луѓе
Гигантот од Волстрит, „Морган Стенли“, ќе им забрани на вработените и клиентите кои не биле целосно вакцинирани против ковид-19 да влегуваат во нивните канцеларии во Њујорк, изјави извор запознат со ситуацијата.
Невакцинираните работници ќе мора да работат од дома, објави Би-Би-Си.
Оваа политика на банката ќе стапи на сила следниот месец, а целта е да се овозможи укинување на другите мерки поврзани со ковид-19.
Минатата недела директорот на банката ги повика вработените да се вратат во своите канцеларии, а во внатрешниот меморандум се наведува дека од 12 јули сите ќе мора да бидат целосно вакцинирани за да влезат во зградите „Морган Стенли“ во Њујорк и Вестчестер.
Овој потег ќе овозможи да се укине задолжителното носење маски во канцелариите и одржување на физичко растојание во банка.