Германската влада им понуди парична компензација и друга помош на Авганистанците на кои првично им беше ветено прифаќање во земјата, доколку доброволно се откажат од тоа право. Министерството за внатрешни работи признава дека не може да гарантира дека програмата за прифаќање од Авганистан ќе биде завршена до крајот на годината, па како алтернатива ја понуди оваа необична мерка, пишува германскиот весник „Фокус“.

Понудата, содржана во писмо на Германската агенција за меѓународна соработка (ГИЗ), се однесува на околу 660 лица кои моментално се наоѓаат во Пакистан и се соочуваат со можност за депортација. Ако ја прифатат понудата, тие ќе се откажат од сите идни побарувања кон германската влада.

Самохраните жени би добиле вкупно 6.500 евра, а семејствата и повисоки износи, како поддршка за враќање во Авганистан или евентуално во трета земја, но само по посебна проверка. Освен финансиска помош, програмата вклучува и медицинска грижа, три месеци сместување и психосоцијална поддршка.

Хуманитарните организации ја осудија понудата. Портпаролката на „Кабул Луфтбрике“, Ева Бајер, изјави дека сумата е недоволна и дека враќањето во Авганистан носи сериозни ризици, бидејќи многумина побегнале токму од талибанскиот режим.

„Не сакам пари ниту храна. Сакам безбедност. Не можам да се вратам,“ изјавил еден од Авганистанците.

Во меѓувреме, само мал број од прифатените успеале да стигнат до Германија – седум семејства со 31 лице пристигнаа во Хановер по судска одлука.